معتقدات سورية

من طرف **ميمي** الإثنين أكتوبر 19, 2009 7:24 pm

* اذا انكسرت كاسة يقال: انكسر الشر

من يأكل من رغيف غيره يخاصمه و يعاديه

* اذا مر حدا فوق الطفل ما بقا يطول ( انو اذا طفل صغير مسطح ما بصير حدا يمر من فوقوا ليشششش لان ما بعود بيطول الولد بيطلع قصير؟؟!!! و متل ما بقول المتل فشخة حية ولا فشخة بنية)

* قص الاظافر بالليل مو منيح (لا تسألو ليش ما بعرف ولا حدا بيعرف بس مو منيح و خلص )

* مراششة الميه فراق (ما بصير حدا يرش رفيقو بالمي لان بعدين بيتفرقوا )

* اذا اجت الكندرة فوق الكندرة يعني رايحين مشوار

* اذا زحف الولد او زقزقت العصافير معناها جاينا ضيوف

*اذا طنت ادنك اليمين حدا عم يحكي عنا بالمنيح و اذا طنت اليسار معناها حدا عم يجيب سيرتنا بالعاطل

* اذا كان في خناقة بيقولوا اقلبوا الصرامي لتحمى الخناقة (شماتة ) الله لا يشمت حدا فينا

* اذا رفت عيني اليمين بيكون جاينا خبر طريف

*اذا رفت عيني الشمال بيكون جاينا خبر مو منيح

* اذا حكني حاجبي معناها بدنا نستقبل حدا جاي من السفر

* و ما بصير الحمام بالليل

*واذا شفت مقص مفتوح لازم فورا تسكرو ( لانو المقص الفاتح تمو بيعمل خناق )

وما بيصير نفتح ونسكر المقص كتير كمان بيعمل خناق

*و دلق القهوة رزقة

*و شرب المي بعد القهوة قلة زوء

*إذا حكني كفي اليمين معناها بدي أقبض مصاري

*و إذا حكني كفي اليسار معناها بدي أدفع مصاري

*و اذا الولد الصغير كتير ابن الشهور عم يضحك لحالو
بيقولو الملايكة بتكون عم تحاكيه

*كمان يلي حامل بصبي بتتباشع

*و ببنت بتحلا

*و كمان إذا حدا صبلك شاي او قهوة وملى الفنجان كتير بكون قلبوه مليان منك واذا صبها ناقصة

هدا دليل على انو هالشخص ناقص
*

واذا عندك ضيف اتقيل دم وبدك يروح من عندك على السريع شك دبووس او

عدة دبابيس بأيد المقشة

*واذا خايف من عين اتصيبك جيب ورقة واكتب عليها اسم الشخص الي خايف

من عينو وغزها بالدبوس وانت عم تقراء المعوذات وتقول من عين فلان و تنفخ

*والي بعد النجوم بيطلعلو تالولات بايدو.

ان شاء الله يعجبوكن

تحياتي

من طرف **Barbie** الإثنين أكتوبر 19, 2009 7:34 pm

اكيد رح عجبونا مشكورة ميمي

من طرف **loloa** الإثنين أكتوبر 19, 2009 7:36 pm

والي بعد النجوم بيطلعلو تالولات بايدو
هي نحنا وصغار كانوا يقولولنا هيك
وكنت خاف عدون
هههههههههه

هههه
تسلم ايديكي حبيبتي

من طرف **سيلين** الإثنين أكتوبر 19, 2009 8:29 pm

تقريبا نفس المعتقدات اللبنانية ايضا
شكرا الك ميمي على المعلومات الجميلة

مع اجمل التحيات

من طرف **ميمي** الإثنين أكتوبر 19, 2009 8:36 pm

مشكورين على مروركن العطر صبايا عطوتو متصفحي

من طرف **hadideeb** الإثنين أكتوبر 19, 2009 8:51 pm

اي والله يا ميمي

واذا كان فيه حالة وفاة لا تقومي بكنس البيت

واذا الوفاة يوم الاثنين يعني المقبرة فتحت وما ببتسكر كل الاسبوع

____________

تسلم ايدك ومنورة
تقبلي مروري