امثال شعبية سورية

من طرف **teshore** الإثنين يونيو 28, 2010 2:20 am

الامثال الشعبية هي جزء من التراث

فمن الامثال الشائعة

1- خذ الاصيلة ونام على الحصيرة

2- يللي بيجرب المجّرب بيكون عقلو مخّرب

3-طول عمرك يا تينة مجعلكة

4-الحية آلت للدودة تضربي على هالآمة الممدودة

5- يآخد الارد على مالو بيروح المال بيصفى الارد على حالو

6-طب الجرة على تما بتطلع البنت لامها

7- ما كل مرة تسلم الجرة

8- دق القرفة ولا صباح السلفة

9-كومة حجار ولا هالجار

10-متل السيل بيغدر بالنهار والليل

11-شو ماطبخت العمشى جوزا بتعشى

12- من قلة تدابيره خلطت حنطته مع شعيره

13-طلطميس مابيعرف الجمعة من الخميس

14- لما فرقوا العقول كل واحد عجبوا عقلوا ولما وزعوا الارزاق ماحدا عجبه رزقوا

15- يللي بيلاعب القط بدو يتحمل خرميشو

16-بعد ماكانت خادمة صارت في البيت حاكمة

17- مثل القردة وشاكلة براسها وردة

18-قرعة ومشطها نص ذراع

19- آل ليه غيرانة وحيرانة وعيونو جوا غطسانة

20-قال خطبوها تعززت تركوها تندمت

21ـ الفاضى يعمل قاضى

22ـ بصلة المحب خروف

23ـ العبد فى التفكير والرب فى التدبير

24ـ باب النجار مخلع

25ـ ان غاب القط العب يا فار

26ـ كول فول وارجاع للأصول

27ـ ما منه خير دخانه بيعمي

28ـ ضربتين عللا الراس بتوجع

29ـ البيت بيت ابونا والغرب يطردونا

30ـ صيت غنى ولا صيت فقر

وهي كمان

* قال الي بجي لعنا اهلا وسهلا والقلب اله هزاز والما بجي لعنا لا اهلا ولا سهلا ولا القلب اله معتاز *
* القرصـة بغضة ولو كـانت من أصابيع فضة , والعضـة محبـة ولو كـانت من أسنان كلبـة *
* الكويسـة كويسـة مـن فيقـت منامـا و البشعـة بشعـة من طلعـة حمامـا *
* مكتر صحابي يوم كرمي دبس.. وما قل صحابي يوم كرمي يبس *
* قالتلا يا ستي خديني معك ، قالتلا لو صح لستك الروحـان *
* أنا وابن عمي على الغريب وأنـا وأخوي على ابن عمي *
* اللي بزورنا بحل البركة و اللي مـا بزورنـا بخفف لبكة *
* العتب مو عليك العتب عاللي سلمك دقنو تنتف فيـا *
* الجاهل بيفعل بنفسه متل مـا بيفعل العدو بعدوه *
* ستي أجتى الرزيه بتاخد الخضرا وبتعيف الطريـه *
* ديك واقف عالبركه بضحك عالناس وهو ضحكـه *
* ال بدخل بين البصلة وقشرتا ما بنوبو الا ريحتا *
* من بيت شقاع لبيت رقاع لبيت وجاع الصعبه *
* قالوا لو للديك صيح قال كل شي بوقتوا حلوا *
* قالوا العاطل صير منيح قال بيصرلي إسمين *
* طول مـا جوزي معي بدير الفلك بأصبعي *
* اللي إلو راس عند الرواس مـا بنام الليـل *
* طـب الجرة على تمها بتطلع البنت لأمها *
* الرجال في البيت رحمة ولو جاب فحمة *
* عيشة الفهيم مع البهيم سقم وعمى *
* بس ما طولت دقن ابنك حلوق دقنـك *
* إحترنى يـا أقرع منين بدنا نمشطك *
* كـل مين بتجوز أمي بسميه عمي *
* اذا احتجت للكلب قللو يا حج كلب *
* إذا ردت تفضح سرك سلموا لمرة *
* عصفور بالأيد ولا عشرة عشجرة *
* البقع مالسطوح بتسلقاه الأرض *
* أنا متل الفريك مـا بحب الشريك*
* البيشتغل بأكلو يا سعادة أهلو *
* احلوق بالفاس ولا تعتاز للناس *
* خذوا البنات من صدور العمات *
* السعد لما بيجي بكسر الباب *
* كلامو متل الفستق الفاضي *
* لا تقول فول ليصير بالمكيول *
* من فاتو اللحم عليه بالمرق *
* أمشي مع السعيد بتسعد *
* كل ديك على مزبلتوا صياح *
* الي عندوا طبيعه ما بيبيعا *
* البغير عادتو بتقل سعادتو *
* ابن الحلال عن ذكره بيبان *
* لاتبيع جلد الدب لتصطاده *
* الآدر هجروه ولا فجره *
* الله يسعدو و يبعدو

[ندعوك للتسجيل في المنتدى أو التعريف بنفسك لمعاينة هذه الصورة]

من طرف **زهرة الجبل** الثلاثاء يوليو 13, 2010 6:40 am

من طرف **هبة نور** الإثنين سبتمبر 27, 2010 12:05 am

يعطيك الف عافية والله انتي موسوعة امثال
الله يحميك
يسلمو

من طرف **hadideeb** الإثنين سبتمبر 27, 2010 12:42 am

- لما فرقوا العقول كل واحد عجبوا عقلوا ولما وزعوا الارزاق ماحدا عجبه رزقوا

___________

والله صحيح

تسلم ايدك ومنور

من طرف **هبة نور** الإثنين سبتمبر 27, 2010 3:54 pm

وفي متل كنت حابة زيدو عمجموعتك
غسل وشك ما بتعرف مين ببوسة وقش بيتك ما بتعرف مين بيدوسو
وكمان
الكلام الك يا جارة اسمعي يا كنة
وفي
يا معتر يا جوز التنتين مرة بتضحك وعشرة بيبكو عنيك التنتين

من طرف **teshore** الثلاثاء سبتمبر 28, 2010 12:59 am

[color=red]زهرة الجبل
هادي
هبة نور
منورين الصفحه بمروركم العطر
هبة نور شكراً ع الامثال الحلوه

من طرف **هبة نور** الثلاثاء سبتمبر 28, 2010 1:38 am

هاي تيشور انا هبة اكيد صرت تعرفني كتيرة لعي هههه
بدي اطلب منك خدمة لو امكن انا كتبت موضوع هوة مو كتير حلو بس ماشي حالو المهم
انا عملت الو ارسال لكل اعضاء المنتدى برسالة خاصة
هيكانا بكون نشرت الموضوع ولا لاء
ولو نشرتو وين بدي لاقي عنوانو خمس طرق لتجد صديق لك والله نسيت شو العنوان بزبط
المهم هوة هيك شي
اي انا هيك عملت صح يما لاء وميرسي اتحملني اي وانا ضفتك للائحة الاصدقاء شلون زبط ما تسالني كتيرة برم الله يعينك

من طرف **ميمي** الثلاثاء سبتمبر 28, 2010 1:56 am

ما شاء الله عنك فعلا موسوعة امثال يعطيك الف العافية

من طرف **هبة نور** الثلاثاء سبتمبر 28, 2010 1:58 am

نسيت قلك كمان في موضوع تاني بعتو الى صفحة التعليقات اسمو الحب من الحب والى الحب ما بعرف مين منن صح انشالله تجاوبني وما تضحك علي بعرف اني جدبة

من طرف **teshore** الخميس سبتمبر 30, 2010 3:29 am

هبة نور كتب:هاي تيشور انا هبة اكيد صرت تعرفني كتيرة لعي هههه
بدي اطلب منك خدمة لو امكن انا كتبت موضوع هوة مو كتير حلو بس ماشي حالو المهم
انا عملت الو ارسال لكل اعضاء المنتدى برسالة خاصة
هيكانا بكون نشرت الموضوع ولا لاء
ولو نشرتو وين بدي لاقي عنوانو خمس طرق لتجد صديق لك والله نسيت شو العنوان بزبط
المهم هوة هيك شي
اي انا هيك عملت صح يما لاء وميرسي اتحملني اي وانا ضفتك للائحة الاصدقاء شلون زبط ما تسالني كتيرة برم الله يعينك

______________

عزيزتي هبة
ماشالله عليك في فترة قصيرة اصبحت نار على علم

للاسف موضوعك هيك ما تم نشره

بتفوتي على القسم المخصص للموضوع

مثلا اذا كان الموضوع حواري فوتي على قسم الحوار

او اذا كان نكتة قسم النكت وهيا

وبعدين افتحي كلمة موضوع جديد
واكتبي الموضوع واعملي ارسال

موفقة انشالله

دوير المليحة العــــــــــــــــــام

يوميــــــــــــــــات المنتــــــــــــــــــــــدى

ألغاز و مســـــــــــــــــــابقات

بلـــــــــــــــدي وبلـــــــــــــــــدك

شـــــــــــــــــــــــــــعر و أدب

ركــــــــــــــــــــــــن الأديان

ركــــــــــــن الأســـــــــرة

الزاوية النسائية

ركـــــــــــــــــــــــــن الفــــــــــــــــــــــــــــن

القســـــــــــــــــــــــم الترفيهـــــــــــــــــــــــــــي

ركــــــــــــــن المعلوماتــــــــــــــــــــــــية

المنتـــــــــــدى الطبـــــــــــــــــــــي

توصـــــــــــــــــيات وشـــــــــــــــــكاوي